26/11 ముంబై దాడులు: మైకును ఆయుధంగా మలచి వేలాది ప్రాణాలు కాపాడిన ‘రియల్ హీరో’ విష్ణు జెండే
నవంబర్ 26, 2008… ముంబై నగరం నెత్తురోడిన ఆ భయంకరమైన రాత్రి ఛత్రపతి శివాజీ టెర్మినస్ (CST) రైల్వే స్టేషన్లో విధులు నిర్వహిస్తున్న అనౌన్సర్ విష్ణు దత్తారామ్ జెండే జీవితంలో ఊహించని పరీక్ష ఎదురైంది. విధి నిర్వహణలో ఆయన చూపిన తెగువ, సమయస్ఫూర్తి ఎంతో మంది పాలిట ప్రాణదాతగా నిలిచాయి.
ఆ రాత్రి అకస్మాత్తుగా స్టేషన్లో పెద్ద శబ్దం, తుపాకీ కాల్పులు దద్దరిల్లాయి. ఇద్దరు ఉగ్రవాదులు స్టేషన్లోకి చొరబడి విచక్షణారహితంగా కాల్పులు జరుపుతున్నారని తన అనౌన్సర్ క్యాబిన్లో ఉన్న విష్ణు జెండే గుర్తించారు. సరిగ్గా అదే సమయానికి ప్లాట్ఫారమ్లకు లోకల్ రైళ్లు వస్తుండటంతో పరిస్థితి మరింత భయానకంగా మారింది. రైలు దిగిన వందలాది మంది ప్రయాణికులు నేరుగా ఆ ఉగ్రవాదుల గుప్పిట్లోకి నడుచుకుంటూ వెళ్తున్నారని ఆయనకు అర్థమైంది.
ఆ క్షణంలో తన ప్రాణాలు కాపాడుకోవడానికి అక్కడి నుండి పారిపోయి తలదాచుకునే అవకాశం విష్ణుకు ఉంది. కానీ, ఆయన తన బాధ్యతను వీడలేదు.
స్టేషన్ అంతటా వినిపించే మైక్రోఫోన్ను చేతిలోకి తీసుకున్నారు. ప్రధాన హాల్ వైపు ఎవరూ రావొద్దని, వెనుక ఉన్న దారుల గుండా సురక్షితంగా బయటకు వెళ్లిపోవాలని హిందీ, మరాఠీ భాషల్లో పదే పదే ప్రయాణికులను హెచ్చరించారు.
ఆయన చేసిన ఆ అనౌన్స్మెంట్లు విన్న వందలాది మంది ప్రయాణికులు అప్రమత్తమై తమ దారి మార్చుకున్నారు. తద్వారా ఉగ్రవాదుల తూటాల నుండి సురక్షితంగా ప్రాణాలతో బయటపడ్డారు.
అనౌన్స్మెంట్లు ఎక్కడి నుండి వస్తున్నాయో పసిగట్టిన ఉగ్రవాదులు, విష్ణు జెండే క్యాబిన్ కిందకు వచ్చి ఆయనపైకి తుపాకీతో కాల్పులు జరిపారు. ఆ సమయంలో ఆయన వద్ద ఎలాంటి ఆయుధంగానీ, రక్షణ కవచంగానీ లేవు. కేవలం ఒక మైక్ మాత్రమే పట్టుకుని ప్రాణాలకు తెగించి తన పోస్టులోనే ఉండిపోయారు. ఉగ్రవాదుల కాల్పుల మధ్య కొద్దిసేపు కిందకు వంగి తలదాచుకున్న ఆయన, మళ్లీ ధైర్యంగా మైక్ ముందుకు వచ్చి ప్రయాణికులను కాపాడే ప్రయత్నం కొనసాగించారు.
తుపాకులు పట్టుకుని అమాయకుల ప్రాణాలు తీసిన హంతకుల పేర్లు చరిత్రలో నిలిచిపోయాయి. కానీ, ఎలాంటి ఆయుధం లేకుండా ఆపద సమయంలో తన గొంతుతో వందలాది మంది మూగజీవుల్లాంటి ప్రయాణికులను కాపాడిన ఆ మౌనయోధుడు విష్ణు జెండే. ప్రాణాలకు తెగించి బాధ్యతను నెరవేర్చిన ఆయన నిజమైన హీరో.
Jai Simha
