హైదరాబాద్: తెలంగాణ రాజకీయాల్లో ఇప్పుడు కొత్త ట్రెండ్ నడుస్తోంది. అదే ‘నాప్తోల్ పాలిటిక్స్’. టీవీల్లో ఉదయం ఒక ఆఫర్, సాయంత్రం ఒక ఆఫర్ ప్రకటించినట్లు.. ఇప్పుడు గల్లీకో కొత్త పార్టీ పుట్టుకొస్తోంది. దశాబ్దానికి పైగా తెలంగాణ రాజకీయాలను శాసించిన, ఇంకా శాసిస్తున్న ఒరిజినల్ బ్రాండ్ బీఆర్ఎస్ మీద అలిగి, సొంత కూతురు కల్వకుంట్ల కవిత గారు ‘తెలంగాణ రాష్ట్ర సేన’ పేరుతో కొత్త దుకాణం తెరవడం ఇప్పుడు రాష్ట్రవ్యాప్తంగా హాట్ టాపిక్ గా, అంతకంటే ఎక్కువ కామెడీగా మారింది.
పాత వస్తువుకి కొత్త స్టిక్కర్
ఒకప్పుడు కారు పార్టీలో కీలకంగా వ్యవహరించి, పదవులు అనుభవించి, ఇప్పుడు ఆ కారు టైర్ల కిందే మేకులు చల్లుతాను అనడం కవిత గారి పొలిటికల్ కామెడీ టైమింగ్ కి నిదర్శనం. బీఆర్ఎస్ పార్టీని జాతీయ స్థాయికి తీసుకెళ్లాలని గులాబీ బాస్ వ్యూహాలు రచిస్తుంటే, తాను మాత్రం మళ్ళీ లోకల్ పాలిటిక్స్ అంటూ పాత టీఆర్ఎస్ (తెలంగాణ రాష్ట్ర సమితి) పేరును పోలి ఉండేలా ‘తెలంగాణ రాష్ట్ర సేన’ అని షార్ట్ కట్ లో నామకరణం చేయడం చూసి జనాలు పగలబడి నవ్వుకుంటున్నారు. నాప్తోల్ లో పాత బ్రాండ్ కు కొత్త స్టిక్కర్ వేసి అమ్మినట్టుంది ఈ కొత్త పార్టీ వ్యవహారం అని రాజకీయ విశ్లేషకులు సెటైర్లు వేస్తున్నారు.
ఆనాడు వైఎస్సార్టీపీ.. ఈనాడు సేన..
గతంలో వైఎస్ షర్మిల గారు కూడా సరిగ్గా ఇలాగే ‘వైఎస్సార్టీపీ’ అనే నాప్తోల్ బంపర్ ఆఫర్ లాంటి పార్టీని తెలంగాణలో లాంచ్ చేశారు. ఊరంతా పాదయాత్రలు చేసి, గొంతు చించుకుని అప్పటి బీఆర్ఎస్ ప్రభుత్వం మీద విమర్శల వర్షం కురిపించారు. చివరికి ఏమైంది? స్టాక్ క్లియరెన్స్ సేల్ అయిపోయినట్టు ఆ పార్టీ బోర్డును తీసుకువెళ్లి పక్క రాష్ట్రంలో పడేశారు. ఇప్పుడు బీఆర్ఎస్ కు వ్యతిరేకంగా కవిత గారు స్థాపించిన ఈ కొత్త పార్టీ పరిస్థితి కూడా రేపు పొద్దున అలాగే కాబోతోందని పొలిటికల్ సర్కిల్స్ లో జోరుగా చర్చ సాగుతోంది.
ఒరిజినల్ ముందు డూప్లికేట్ పప్పులు ఉడుకుతాయా?
నాప్తోల్ లో ఎన్ని డూప్లికేట్ ప్రొడక్ట్స్ వచ్చినా, కేసీఆర్ గారు నిర్మించిన ఒరిజినల్ బ్రాండ్ రేంజ్ వేరు. బీఆర్ఎస్ అనే మహా వృక్షం కింద ఎదిగి, ఇప్పుడు ఆ చెట్టు కొమ్మలే నరుకుతాను అంటే అది కేవలం మీమ్స్ కి, సోషల్ మీడియా ట్రోల్స్ కి పనికొస్తుంది తప్ప ఓట్ల మైలేజ్ కి ఏమాత్రం పనికిరాదు. ఒరిజినల్ రెసిపీ కేసీఆర్ గారి దగ్గర పెట్టుకుని, కవిత గారు బయటకొచ్చి డూప్లికేట్ ఫాస్ట్ ఫుడ్ సెంటర్ పెడితే జనాలు ఎందుకు వెళ్తారు?
మొత్తం మీద, బీఆర్ఎస్ స్ట్రాంగ్ ఫౌండేషన్ ని కదపడం ఇలాంటి డూప్లికేట్ పార్టీల వల్ల అయ్యే పని కాదని తెలంగాణ ప్రజలకు స్పష్టంగా అర్థమైపోయింది. సొంత పార్టీ మీద అలిగి కొత్త పార్టీ పెడితే, అది రాజకీయ వ్యూహం అనిపించుకోదు.. కేవలం నాప్తోల్ మెగా సేల్ మాత్రమే అవుతుందని పరిశీలకులు తేల్చి చెబుతున్నారు.
