ఆయుష్ మాలిక్ కేసులో ఫేక్ న్యూస్ బ్యాచ్ ఆటకట్టు! తప్పుడు వార్తలు రాసిన ‘రాడికల్ ముస్లిం ఇన్‌ఫ్లుయెన్సర్ల’పై కొరడా.
ఉత్తరప్రదేశ్ లోని షామ్లీకి చెందిన ఆయుష్ మాలిక్ మత మార్పిడి కేసుకు సంబంధించి తప్పుడు వార్తలను (ఫేక్ న్యూస్) వ్యాప్తి చేసినందుకుగాను ఆరుగురు సోషల్ మీడియా ఇన్‌ఫ్లుయెన్సర్లపై షామ్లీ పోలీసులు ఎఫ్ఐఆర్ (FIR) నమోదు చేశారు. సున్నితమైన ఈ వ్యవహారంపై సోషల్ మీడియాలో తప్పుడు సమాచారం వ్యాప్తి చెందుతుండటంతో పోలీసులు ఈ కఠిన చర్యలు తీసుకున్నారు. ఎక్స్ (ట్విట్టర్), ఫేస్‌బుక్ వేదికగా ఈ వదంతులు సృష్టించబడ్డాయి.
అలహాబాద్ హైకోర్టులో జరిగిన విచారణలో షామ్లీ పోలీసులను న్యాయస్థానం తీవ్రంగా మందలించిందని ఈ ఆరు ఖాతాల ద్వారా తప్పుడు ప్రచారం జరిగింది. ఎక్స్ (X) ఖాతాలైన కరిష్మా అజీజ్, నిఖత్ అలీ, ది ముస్లిం, వసీమ్ అక్రమ్ త్యాగి, సయ్యద్ కైఫ్ హసన్ తో పాటు ఫేస్‌బుక్ లో నదీమ్ సయీ అనే ఖాతాపై కొత్వాలి షామ్లీ పోలీస్ స్టేషన్ లో కేసు నమోదైంది. కోర్టు విచారణ గురించి ప్రజలను తప్పుదోవ పట్టించేలా వీరు పోస్టులు చేశారని పోలీసులు స్పష్టం చేశారు.
అసలు కోర్టులో ఏం జరిగిందంటే.. సెప్టెంబర్ 9, 2026న ఆయుష్ మాలిక్ స్నేహితుడు సుల్తాన్ ఖారీ హైకోర్టులో హెబియస్ కార్పస్ పిటిషన్ వేశారు. ఆయుష్‌ను కోర్టు ముందు హాజరుపరచి అతని వాంగ్మూలం నమోదు చేయాలని కోరారు. దీనిపై స్పందించిన కోర్టు సెప్టెంబర్ 16న ఆయుష్ తో పాటు అతని తండ్రి దేవరాజ్ మాలిక్ ను హాజరుపరచాలని ఆదేశించింది. పోలీసుల భద్రత నడుమ వారు కోర్టులో హాజరై వాంగ్మూలం ఇచ్చినప్పటికీ, విచారణలో పోలీసులకు చివాట్లు తప్పలేదంటూ సోషల్ మీడియాలో కొందరు పనిగట్టుకుని అసత్యాలను ప్రచారం చేశారు.
ఆయుష్ మాలిక్ కేసు నేపథ్యం చూస్తే.. షామ్లీలో ఓ ప్రముఖ ఫార్మా వ్యాపారి ఏకైక కుమారుడైన ఆయుష్, జిమ్ ట్రైనర్ అయిన చాందినీ ఖురేషీని వివాహం చేసుకుని తన పేరును మొహమ్మద్ అలీగా మార్చుకుని ఇస్లాం మతంలోకి మారాడు. అయితే, ఆస్తుల కోసమే చాందినీ, ఆమె కుటుంబ సభ్యులు ఆయుష్‌ను బ్రెయిన్ వాష్ చేసి కుట్రపూరితంగా మతం మార్చారని అతని కుటుంబం ఆరోపించింది. ఈ మేరకు జూన్ నెలలో 11 మందిపై కేసు నమోదు చేయగా, పోలీసులు చాందినీ, ఆమె తండ్రిని అరెస్ట్ చేశారు. ఆ తర్వాత జూలైలో వారు బెయిల్ పై విడుదలయ్యారు.
ఈ మత మార్పిడి సంఘటన స్థానిక హిందూ సమాజంలో తీవ్ర ఆగ్రహానికి దారితీసింది. ఆ పరిణామాల మధ్య ఆయుష్ తిరిగి హిందూ మతంలోకి వచ్చేశాడని వార్తలు వచ్చాయి. కానీ, అనూహ్యంగా అలహాబాద్ హైకోర్టు ముందు ఆయుష్ మాలిక్ తన వాంగ్మూలం ఇస్తూ.. తనను ఎవరూ బెదిరించలేదని, ఎలాంటి ఒత్తిడి లేకుండా తన సొంత ఇష్టప్రకారమే ఇస్లాం మతాన్ని స్వీకరించానని స్పష్టం చేయడం గమనార్హం.
