లోక్సభలో ప్రతిపక్ష నాయకుడు రాహుల్ గాంధీ ప్రవర్తన, ఆయన ఉపయోగించిన భాష పార్లమెంటరీ మర్యాదలకు విరుద్ధంగా ఉన్నాయంటూ బీజేపీ ఎంపీ అనురాగ్ ఠాకూర్ తీవ్ర స్థాయిలో మండిపడ్డారు. రాహుల్ గాంధీ సభా హక్కుల ఉల్లంఘనకు పాల్పడ్డారని ఆరోపిస్తూ ఆయనపై చర్యలు తీసుకోవాలని కోరుతూ లోక్సభ స్పీకర్ ఓం బిర్లాకు మూడు పేజీల సమగ్రమైన లేఖను సమర్పించారు. చట్టాలు చేసే అత్యున్నత వేదికైన పార్లమెంటులో సభాపతి సూచనలను పదేపదే ధిక్కరించడం, ఎలాంటి ముందస్తు నోటీసు ఇవ్వకుండా తీవ్రమైన ఆరోపణలు చేయడం మరియు దేశ పౌరులను అవమానించేలా మాట్లాడటం ప్రజాస్వామ్య హోదాకు తగదని ఠాకూర్ తన లేఖలో ఆందోళన వ్యక్తం చేశారు.
సభలో నిబంధన 352, 353లను ఉల్లంఘిస్తూ రాహుల్ గాంధీ అనుచితమైన, అవమానకరమైన భాషను ఉపయోగించారని అనురాగ్ ఠాకూర్ స్పష్టం చేశారు. ఒక విద్యార్థితో జరిగిన సంభాషణ నెపంతో దేశ పౌరులను, ప్రభుత్వ మద్దతుదారులను ‘మూర్ఖులు’, ‘అంధ భక్తులు’ అని సంబోధించడం సభా మర్యాదలకు పూర్తిగా విరుద్ధమని వేలెత్తి చూపారు. లోక్సభ సచివాలయం రూపొందించిన అనుచిత పదజాలం (Unparliamentary words) జాబితా ప్రకారం ఇలాంటి పదాలను సభలో వాడకూడదని స్పష్టమైన నిబంధనలు ఉన్నాయని గుర్తుచేశారు. ఈ క్రమంలో కేంద్ర పార్లమెంటరీ వ్యవహారాల మంత్రి కిరణ్ రిజిజు అభ్యంతరం తెలిపినా, స్పీకర్ హెచ్చరించినా రాహుల్ గాంధీ లక్ష్యం చేయలేదని విమర్శించారు. అంతేకాకుండా ఎలాంటి ముందస్తు నోటీస్ ఇవ్వకుండానే కేంద్ర హోంమంత్రి అమిత్ షాపై తీవ్రమైన వ్యక్తిగత ఆరోపణలు చేస్తూ, చర్చకు సంబంధం లేని అంశాలను తీసుకొచ్చి సభా సమయాన్ని వృధా చేశారని ఆరోపించారు.
ఈ వ్యవహారంపై సమగ్ర విచారణ జరిపేందుకు పార్లమెంటరీ నిబంధన 227 కింద ఈ అంశాన్ని వెంటనే ‘ప్రివిలేజెస్ కమిటీ’కి (సభా హక్కుల కమిటీ) నివేదించాలని అనురాగ్ ఠాకూర్ స్పీకర్ను కోరారు. సభ ధిక్కరణకు పాల్పడి కార్యకలాపాలకు ఆటంకం కలిగించినందుకు గాను మొత్తం సభకు, అలాగే కేంద్ర హోంమంత్రి అమిత్ షాకు రాహుల్ గాంధీ బేషరతుగా క్షమాపణ చెప్పేలా తగిన ఆదేశాలు జారీ చేయాలని విజ్ఞప్తి చేశారు. పార్లమెంటరీ నిబంధనలు, సభా మర్యాదలు సభ్యులందరికీ సమానమేనని, బాధ్యతాయుతమైన పదవిలో ఉన్న నాయకులు వ్యవస్థల గౌరవాన్ని కాపాడేలా ప్రవర్తించాలే తప్ప హేళన చేసేలా ఉండకూడదని ఈ ఘటన స్పష్టం చేస్తోందని ముగించారు.
