ఉగ్రవాదులకు రెడ్ కార్పెట్ – సొంత ప్రజలకి మరణశాసనం!పాకిస్థాన్ ‘డీప్-స్టేట్’ అసలు బండారం!

–జర్నలిస్ట్ శిరీష (స్పెషల్ ఇన్వెస్టిగేటివ్ రిపోర్ట్)

అంతర్జాతీయ సమాజం ముందు అమాయకత్వం నటిస్తూనే, తెరవెనుక ఉగ్రవాదానికి ఊపిరి పోస్తున్న పాకిస్థాన్ కపట బుద్ధి మరోసారి బట్టబయలైంది. ఒకపక్క సొంత దేశంలో ప్రజలు గుక్కెడు నీళ్లు, పిడికెడు అన్నం కోసం వీధుల్లోకి వచ్చి హాహాకారాలు చేస్తుంటే.. పాకిస్థాన్ పాలకులు, సైన్యం మాత్రం లష్కరే తొయిబా (LeT), ఐఎస్ఐ (ISI) ఉగ్రవాదులకు వీఐపీ మర్యాదలు చేస్తున్నారు. జాతీయవాద కోణంలో, వాస్తవ భౌగోళిక రాజకీయాలను (Geopolitics) విశ్లేషిస్తే.. పాకిస్థాన్ తన ఉనికిని కాపాడుకునే క్రమంలో ఎంతటి బరితెగింపునకు పాల్పడుతోందో అర్థమవుతుంది. పీవోకే (POK) లో జరుగుతున్న మారణకాండ నుంచి ఢిల్లీలో పన్నిన భారీ ఉగ్ర కుట్రల వరకు.. పాకిస్థాన్ ‘డబుల్ గేమ్’ ను డీకోడ్ చేసే సమగ్ర విశ్లేషణ ఇది.

క్రికెట్ – టెర్రరిజం నెక్సస్: సెలబ్రిటీల ముసుగులో రాక్షస క్రీడ

పాకిస్థాన్ లో ఉగ్రవాదులు అజ్ఞాతంలో ఉండరు, వారు పబ్లిక్ ఫిగర్స్. ఈ వాస్తవం పాక్ మాజీ ఫాస్ట్ బౌలర్ షోయబ్ అక్తర్ ఇంట్లో జరిగిన ఓ విషాదకర సంఘటన ద్వారా మరోసారి రుజువైంది. జూన్ 24న అక్తర్ సోదరుడు షాహిద్ అక్తర్ అంత్యక్రియలు ఇస్లామాబాద్‌ లో జరిగాయి. ఈ కార్యక్రమానికి ప్రపంచం మోస్ట్ వాంటెడ్ గా పరిగణిస్తున్న లష్కరే తొయిబా టాప్ కమాండర్లు సైఫుల్లా కసూరి, 26/11 ముంబై దాడుల మాస్టర్ మైండ్ హఫీజ్ సయీద్ కుమారుడు తల్హా సయీద్ దర్జాగా హాజరయ్యారు. వీరు దొంగచాటుగా రాలేదు.. సాధారణ జనాలతో పాటు క్యూలో నిలబడి, వీఐపీల్లా అక్కడున్న వారితో మాట్లాడారు.

దీనిపై అక్తర్ గానీ, పాక్ భద్రతా దళాలు గానీ ఏమాత్రం ఆక్షేపణ వ్యక్తం చేయలేదు. దీనికి ప్రధాన కారణం.. సైద్ధాంతికంగా అక్తర్ లాంటి వారికి కూడా ఈ ఉగ్ర మూకలతో ఉన్న సానుభూతే. 2020లో అక్తర్ “గజ్వా-ఏ-హింద్” (భారత్‌పై పవిత్ర ఇస్లామిక్ యుద్ధం) గురించి బహిరంగంగా మాట్లాడుతూ.. ముందు కశ్మీర్‌ను ఆక్రమించి, ఆ తర్వాత నలువైపుల నుంచి భారత్‌పై దండెత్తుతామని వ్యాఖ్యానించాడు. తాలిబాన్లతో చర్చలకు మొగ్గుచూపే ఇమ్రాన్ ఖాన్ (‘తాలిబాన్ ఖాన్’), దావూద్ ఇబ్రహీంతో వియ్యమందిన జావేద్ మియాందాద్.. ఇలా పాక్ క్రికెట్ చరిత్రకు, ఉగ్రవాదానికి ఉన్న బంధం విడదీయరానిది. ఈ సంబంధాలు పాక్ లో ఉగ్రవాదం అనేది కేవలం ఒక ఫ్రింజ్ గ్రూప్ చేతిలో లేదని, అది వారి మైనర్ అండ్ మేజర్ సొసైటీలో పాతుకుపోయిందని స్పష్టం చేస్తున్నాయి.

ఉగ్రవాదులకు దొడ్డిదారిన రాజకీయ చట్టబద్ధత

అంతర్జాతీయ ద్రవ్య లావాదేవీల పర్యవేక్షణ సంస్థ (FATF) పాకిస్థాన్ ను గ్రే లిస్ట్ నుంచి బ్లాక్ లిస్ట్ లో పెడతామని హెచ్చరించినప్పుడు, పాక్ డీప్-స్టేట్ (సైన్యం-ఐఎస్ఐ) వేసిన అతిపెద్ద మాస్టర్ స్ట్రోక్.. ఉగ్రవాదులను రాజకీయ నాయకులుగా మార్చడం. జమాత్-ఉద్-దవా (JuD), మిల్లీ ముస్లిం లీగ్ (MML) లాంటి సంస్థలపై నిషేధం పడగానే, వారు పాకిస్థాన్ మర్కజీ ముస్లిం లీగ్ (PMML) అనే కొత్త రాజకీయ పార్టీ ముసుగు వేసుకున్నారు.

2024 పాకిస్థాన్ సార్వత్రిక ఎన్నికల్లో ఈ పీఎంఎంఎల్ పార్టీ ఏకంగా 507 మంది అభ్యర్థులను జాతీయ, రాష్ట్ర అసెంబ్లీ బరిలో నిలబెట్టింది. ఉగ్రవాది హఫీజ్ సయీద్ కొడుకు తల్హా సయీద్ లాహోర్ (NA 127) నుంచి ప్రత్యక్షంగా పోటీ చేశాడు. వీరికి 5.25 లక్షల పైగా ఓట్లు రావడం పాక్ సమాజపు రాడికలైజేషన్ స్థాయిని చూపుతోంది. ఇంతేకాదు, పాక్ ప్రధాని సలహాదారు రాణా సనావుల్లాతో తల్హా సయీద్ ఒకే వేదిక పంచుకోవడం, మిలిటరీ మీటింగ్‌లకు ఉగ్రవాదులను ఆహ్వానిస్తున్నారని కసూరి స్వయంగా ఒప్పుకోవడం చూస్తే.. ఉగ్రవాదులే పరోక్షంగా పాక్ ప్రభుత్వాన్ని నడుపుతున్నారని స్పష్టమవుతోంది.

అభేద్యమైన భారత నిఘా.. కుదేలైన ఐఎస్ఐ నెట్వర్క్

ఒకపక్క తమ దేశంలో ఉగ్రవాదులను రాజకీయ నాయకులుగా తీర్చిదిద్దుతూనే, మరోపక్క పాక్ ఐఎస్ఐ భారత్ పై దాడులకు ప్లాన్ చేస్తూనే ఉంది. ఇటీవలే ఢిల్లీ పోలీస్ స్పెషల్ సెల్ అత్యంత చాకచక్యంగా ఒక ఇంటర్నేషనల్ ఐఎస్ఐ టెర్రర్ మాడ్యూల్ ను ఛేదించి ఏడుగురిని (అనస్, మోహిత్, దీపక్ తదితరులు) అరెస్ట్ చేసింది.

వీరి మోడస్ ఆపరెండీ (Modus Operandi) చాలా ప్రమాదకరమైనది. పాకిస్థాన్ నుంచి డ్రోన్ల ద్వారా పంజాబ్ లోకి ఆయుధాలు, హెరాయిన్ స్మగ్లింగ్ చేయడం.. ఆ డ్రగ్స్ అమ్మగా వచ్చిన డబ్బుతో సోషల్ మీడియా ద్వారా భారత యువతను ఉగ్రవాదం వైపు ఆకర్షించడం వీరి ప్లాన్. ఢిల్లీ-ఎన్సీఆర్ లోని మత పెద్దలను టార్గెట్ చేసి మతకల్లోలాలు సృష్టించాలని ఐఎస్ఐ హ్యాండ్లర్లు షాబాజ్ భట్టి, అజ్మల్ గుజ్జర్ కుట్ర పన్నారు. కానీ, నవ భారత భద్రతా దళాల అప్రమత్తత వల్ల పాక్ కుట్రలు ఆరంభంలోనే తుత్తినియలయ్యాయి.

పాక్ ‘డైవర్షన్ పాలిటిక్స్’: నీళ్ల పేరుతో యుద్ధోన్మాదం

తమ అంతర్గత వైఫల్యాలను, ముఖ్యంగా ఆర్థిక, నీటి సంక్షోభాలను కప్పిపుచ్చుకోవడానికి పాకిస్థాన్ నాయకులు ఎప్పుడూ వాడే బ్రహ్మాస్త్రం.. ‘భారత్ పై ద్వేషం’. ఇటీవలే పాక్ డిఫెన్స్ మినిస్టర్ ఖవాజా ఆసిఫ్.. సింధు జలాల ఒప్పందం (Indus Water Treaty) విషయమై భారత్ పై ఏకంగా యుద్ధం చేస్తామంటూ బెదిరింపులకు దిగాడు. కశ్మీర్ లోని పెహల్గాం ఉగ్రదాడి తర్వాత భారత్ ఉద్దేశపూర్వకంగానే ట్రీటీని సస్పెన్షన్ లో పెట్టి గట్టి వార్నింగ్ ఇచ్చింది.

నిజానికి పాక్ లో వచ్చిన వాటర్ క్రైసిస్ కు ఇండియా కారణం కాదు. సింధ్ ఇరిగేషన్ డిపార్ట్మెంట్ అధికారిక లెక్కల ప్రకారమే.. నార్త్ వెస్ట్ కెనాల్ లో 64%, దాదూ కెనాల్ లో ఏకంగా 82% నీటి కొరత ఉంది. సుక్కూర్ బ్యారేజ్ నిర్వహణ పూర్తిగా విఫలమైంది. మూడో వంతు పాక్ జనాభా నీటి కరువుతో అల్లాడుతున్నారు. ఈ ఘోరమైన మిస్ మేనేజ్మెంట్ ను దాచిపెట్టి, ప్రజల మైండ్ డైవర్ట్ చేయడానికే పాక్ నేతలు భారత్ పై యుద్ధం అంటూ గల్లీ మాటలు మాట్లాడుతున్నారు. భారత విదేశాంగ శాఖ (MEA) అధికార ప్రతినిధి రణధీర్ జైస్వాల్ దీనికి దీటుగా బదులిస్తూ.. “మానవ హక్కుల ఉల్లంఘనలను దాచేందుకే పాకిస్థాన్ ఈ చౌకబారు ఆరోపణలు చేస్తోంది” అని అంతర్జాతీయ వేదికపై పాక్ పరువు తీశారు.

పీవోకేలో దారుణమైన మారణకాండ: కనీస అవసరాల దిగ్బంధనం

ఈ మొత్తం ఎపిసోడ్ లో అత్యంత హృదయవిదారకమైన, ప్రపంచం దృష్టి సారించాల్సిన విషయం.. పాక్ ఆక్రమిత కశ్మీర్ (POK) లో పాక్ సైన్యం సాగిస్తున్న నరమేధం. పీవోకే అసెంబ్లీలోని 12 సీట్లను అడ్డం పెట్టుకుని ఇస్లామాబాద్ తమకు అనుకూలమైన కీలుబొమ్మ ప్రభుత్వాన్ని ఏర్పాటు చేయాలని చూసింది. దీనికి వ్యతిరేకంగా ‘జాయింట్ అవామీ యాక్షన్ కమిటీ (JAAC)’ ఆధ్వర్యంలో పీవోకే ప్రజలు రోడ్లెక్కి తిరుగుబాటు చేస్తున్నారు.

వారిని అణచివేయడానికి పాక్ సైన్యం వారిపై ఏకంగా ‘ఎకనామిక్ బ్లాకేడ్’ (ఆర్థిక దిగ్బంధనం) విధించింది. గత కొన్ని వారాలుగా రావల్ కోట్, ముజఫరాబాద్ సహా అనేక ప్రాంతాలకు ఆహారం, ప్రాణరక్షక మందులు వెళ్లకుండా సైన్యం చెక్ పోస్టుల వద్ద ఆపేస్తోంది. 64 ఏళ్ల మహ్మద్ మస్కీన్ లాంటి వృద్ధులకు కనీసం మందులు దొరకడం లేదు. నవీద్ అనే యువకుడు తన గర్భిణీ భార్య కోసం పంజాబ్ నుంచి మందులు, ఆహారం తెస్తుంటే.. ఆజాద్ పఠాన్ చెక్ పోస్ట్ వద్ద పాక్ పోలీసులు ఆ వస్తువులను లాక్కొని రోడ్డుపై పారబోయించారు. డబ్బులు కట్టి 15 రోజులు అవుతున్నా పిండి దొరక్క జనాలు అల్లాడుతున్నారు. పాక్ ప్రభుత్వ దమనకాండలో ఇప్పటికే 58 మందికి పైగా అమాయకులు ప్రాణాలు కోల్పోయారు.

కాలగర్భంలో కలవనున్న ‘టెర్రరిస్తాన్’

ఒక్కసారి విశ్లేషించండి.. ప్రపంచానికి ముప్పుగా మారిన ఉగ్రవాదులకు పాకిస్థాన్ లో వీఐపీ స్వేచ్ఛ ఉంటుంది. వారు ఎన్నికల్లో నిలబడతారు, సెలబ్రిటీల ఇళ్లలో విందులు ఆరగిస్తారు. కానీ తమ హక్కుల కోసం, గుక్కెడు నీళ్లు, పిడికెడు తిండి కోసం రోడ్డెక్కిన పీవోకేలోని సొంత ప్రజలను మాత్రం పాక్ సైన్యం కర్కశంగా కాల్చి చంపుతోంది, ఆకలితో మాడ్చుతోంది.

ఉగ్రవాదాన్ని ఒక స్టేట్-పాలసీగా మార్చుకున్న ఏ దేశమూ బాగుపడిన దాఖలాలు చరిత్రలో లేవు. ఒకవైపు బలోపేతమవుతున్న నవ భారతదేశ భద్రతా వ్యూహాలు, మరోవైపు సొంత దేశంలో పీవోకే, బలూచిస్థాన్ ప్రజల తిరుగుబాట్ల మధ్య పాకిస్థాన్ ఉక్కిరిబిక్కిరి అవుతోంది. 70 వేల మందితో పీవోకేలో మొదలైన ఉద్యమం, రేపు లక్ష మందితో ముజఫరాబాద్ వైపు మార్చ్ చేయడానికి సిద్ధమవుతోంది. కర్మ సిద్ధాంతం ప్రకారం.. ఇతరుల కోసం పాకిస్థాన్ తవ్విన ఉగ్రవాద గోతుల్లో, ఇప్పుడు ఆ దేశమే పడి నాశనమయ్యే రోజు ఎంతో దూరం లేదు. వాస్తవాలను నిర్భయంగా ఎదుర్కోవడంలో, ఉగ్రవాదం పట్ల ‘జీరో టాలరెన్స్’ చూపించడంలో భారత్ తీసుకుంటున్న కఠిన వైఖరే భవిష్యత్తుకు మార్గదర్శకం.