ఢిల్లీలోని జంతర్ మంతర్ వద్ద చోటుచేసుకున్న హింసాత్మక ఘటనలు దేశవ్యాప్తంగా తీవ్ర కలకలం రేపుతున్నాయి. విధి నిర్వహణలో ఉన్న పోలీసులపై జరిగిన పాశవిక దాడులను నిరసిస్తూ, ఢిల్లీ పోలీసుల కుటుంబ సభ్యులు వీధుల్లోకి వచ్చి న్యాయం కోసం గళమెత్తారు. రేయింబవళ్లు ప్రజల ప్రాణాలను కాపాడే పోలీసులకే భద్రత లేకపోతే, ఇక సామాన్యుల పరిస్థితి ఏమిటని వారు తీవ్ర ఆవేదన వ్యక్తం చేస్తున్నారు. శాంతియుత నిరసనల ముసుగులో దాడులకు పాల్పడిన అల్లరి మూకలను తక్షణమే గుర్తించి కఠినంగా శిక్షించాలని వారు డిమాండ్ చేస్తున్నారు.
ఈ దాడుల్లో తీవ్రంగా గాయపడిన ఒక ఏసీపీ పిల్లలు మీడియా ముందు పంచుకున్న విషయాలు ప్రతి ఒక్కరినీ కలచివేస్తున్నాయి. దెబ్బలతో తన తండ్రి ఇంటికి వచ్చినప్పుడు ఆయన వేసుకున్న ఖాకీ యూనిఫాం పూర్తిగా రక్తంతో తడిసిపోయి ఉందని కుమారుడు కన్నీటిపర్యంతమయ్యాడు. అలాగే, ఆ ఏసీపీ కూతురు మాట్లాడుతూ.. “నేను కూడా ఒక స్టూడెంట్ని. మా నాన్న విద్యార్థులపై ఎప్పుడూ దాడి చేయరు, వారిపై శ్రద్ధ చూపిస్తారు. ఆయనకు ఇలా జరగాల్సింది కాదు” అంటూ కన్నీళ్లు పెట్టుకున్నారు.
జంతర్ మంతర్ వద్ద జరిగింది కేవలం విద్యార్థుల నిరసన కాదని, ఆ గుంపులో కొందరు అసాంఘిక శక్తులు ఉద్దేశపూర్వకంగా చొరబడి పోలీసులపై దాడులు చేశారని ఆ కూతురు ఆరోపించారు. చట్టం ముందు అందరూ సమానమేనని, ప్రాణాలకు తెగించి పోరాడే పోలీసులకు కూడా జీవించే హక్కు ఉందని సుప్రీంకోర్టును ఉద్దేశించి ఆమె అన్నారు. ఈ హృదయ విదారక ఘటన పోలీసు వర్గాల్లో తీవ్ర ఆందోళన నింపగా.. రక్షకుల కుటుంబాలకు న్యాయం చేయాలని వారు వేడుకుంటున్నారు.
