తమిళనాడులోని కరూర్ ప్రాంతంలో జరిగిన ఓ విషాద ఘటనలో ప్రాణాలు కోల్పోయిన 41 బాధిత కుటుంబాలను పరామర్శించేందుకు వెళ్లిన విజయ్ పర్యటన తీవ్ర చర్చనీయాంశంగా మారింది. గతంలో ముఖ్యమంత్రి స్టాలిన్ ఈ పర్యటనను అడ్డుకునే ప్రయత్నం చేయడంతో, ఆశించిన స్థాయిలో బాధితులను కలవలేక విజయ్ వర్చువల్ గానే తన సహాయాన్ని ప్రకటించి ఆగిపోయారు. అయితే తాజాగా మరోసారి ప్రభుత్వం అడ్డంకులు సృష్టించినప్పటికీ, వెనక్కి తగ్గకుండా ఏకంగా సుప్రీంకోర్టును ఆశ్రయించి మరీ పర్యటనకు ఆయన క్లియరెన్స్ తెచ్చుకున్నారు. న్యాయపోరాటం చేసి మరీ కరూర్ చేరుకుని బాధిత కుటుంబాలకు అండగా నిలవడం, వారికి సహాయం చేస్తానని భరోసా ఇవ్వడం వరకు అంతా బాగానే ఉన్నప్పటికీ, ఇదే కరూర్ నేపథ్యంలో తెరపైకి వచ్చిన మరో దేవాదాయ భూముల వ్యవహారం ఇప్పుడు తీవ్ర కలకలం రేపుతోంది.
కరూర్ పరిధిలోని నాలుగు ప్రధాన ఆలయాలకు చెందిన సుమారు రూ.25 వేల కోట్ల విలువైన 385 ఎకరాల దేవాదాయ భూముల పంపిణీ ఇప్పుడు రాష్ట్రవ్యాప్తంగా పెను దుమారం రేపుతోంది. ఈ భూములను కొందరు ఆక్రమించుకోగా, నిబంధనల ప్రకారం వారిని అక్కడి నుంచి ఖాళీ చేయించాలి లేదా ప్రభుత్వం ఆలయాలకు తగిన పరిహారం చెల్లించి వారికి పట్టాలు ఇవ్వాలి. కానీ, ఇవేమీ పట్టించుకోకుండా దేవాదాయ శాఖకు ఒక్క రూపాయి కూడా చెల్లించకుండా ఆక్రమణదారులకే ఆస్తులను కట్టబెట్టేలా అధికార యంత్రాంగం నిర్ణయం తీసుకుంది. 1963నాటి అబాలిషన్ అండ్ కన్వర్షన్ ఇంటూ రైతువారీ చట్టాన్ని సైతం పక్కనపెట్టి, ఆక్రమణదారులకే వారి ఆధీనంలో ఉన్న భూములు, దుకాణాలను రిజిస్టర్ చేయాలని స్థానిక కలెక్టర్ సి.ముత్తుకుమారన్ తో ఆదేశాలు జారీ చేయించారు. కేవలం ఓటు బ్యాంకు రాజకీయాల కోసమే ఏకంగా దేవుడి ఆస్తులను సైతం అధికార పక్షం అడ్డగోలుగా దోచిపెడుతోందన్న తీవ్ర విమర్శలు ఈ పరిణామంపై వ్యక్తమవుతున్నాయి.
