సినిమాల్లో ‘కేజీయఫ్’ (KGF) సామ్రాజ్యాన్ని చూసి మనం రోమాంచితమయ్యాం. ఎర్రటి మట్టి పొరల కింద దాగిన పసిడి కోసం రాకీ భాయ్ సృష్టించిన సామ్రాజ్యం తెరపై ఒక అద్భుతం. కానీ అది రీల్.. ఇప్పుడు మనం చూడబోయేది రియల్! ఒకప్పుడు ‘సోనే కీ చిడియా’ (బంగారు పిచ్చుక) అని పిలువబడిన మన దేశంలో, మరొక్కసారి నేల తల్లి తన గర్భంలో దాచుకున్న బంగారు సిరిని మనకు అందించబోతోంది. దానికి వేదిక కాబోతోంది నవ్యాంధ్ర ప్రదేశ్ లోని కర్నూలు జిల్లా జొన్నగిరి!
దేశంలోనే మొట్టమొదటి ప్రైవేట్ రంగ బంగారు గని రేపు జొన్నగిరిలో ప్రారంభం కాబోతోంది. ఏకంగా 1,477 ఎకరాల సువిశాల విస్తీర్ణంలో, భూమికి 2 కిలోమీటర్ల లోతున ఉన్న ఈ బంగారు నిక్షేపాలను వెలికితీసేందుకు సర్వం సిద్ధమైంది. సుమారు రూ.320 కోట్ల పెట్టుబడితో నిర్మించిన ఈ ప్రాజెక్టును రాష్ట్ర ముఖ్యమంత్రి చంద్రబాబు నాయుడు రేపు ప్రారంభించనుండటమే కాకుండా, రెండో యూనిట్ కు శంకుస్థాపన కూడా చేయనున్నారు. ఏటా కనీసం 1000 కేజీల స్వచ్ఛమైన బంగారాన్ని ఉత్పత్తి చేయడమే ఈ ప్రాజెక్టు లక్ష్యం.
ఒక జాతీయవాద కోణంలో, అభివృద్ధి కాముక దృక్పథంతో చూస్తే.. ఈ ప్రాజెక్టు కేవలం ఏపీకే కాదు, యావత్ భారతదేశ గతిని మార్చే సత్తా ఉన్న అద్భుత ఘట్టం. దీని వల్ల జరిగే ప్రయోజనాలు ఇలా ఉన్నాయి:
దేశానికి లాభం – ‘ఆత్మనిర్భర్ భారత్’ దిశగా స్వర్ణాధ్యాయం: భారతీయులకు బంగారంపై ఉన్న మక్కువ గురించి ప్రత్యేకంగా చెప్పనక్కర్లేదు. కానీ, మన అవసరాల కోసం ఏటా వేలాది టన్నుల బంగారాన్ని ఇతర దేశాల నుంచి దిగుమతి చేసుకుంటున్నాం. దీనివల్ల మన అమూల్యమైన విదేశీ మారక ద్రవ్యం వందల కోట్లలో ఇతర దేశాలకు తరలిపోతోంది. ఇటువంటి తరుణంలో జొన్నగిరి ప్రాజెక్టు దేశ ఆర్థిక వ్యవస్థకు ఒక సంజీవని.
- దిగుమతుల భారం తగ్గింపు: స్వదేశంలోనే ఏటా టన్నుల కొద్దీ పసిడి ఉత్పత్తి జరగడం వల్ల విదేశాలపై ఆధారపడటం తగ్గుతుంది. ఇది స్వయం సమృద్ధి (ఆత్మనిర్భర్ భారత్) లక్ష్య సాధనలో కీలక అడుగు.
- రూపాయికి దన్ను: విదేశీ మారక ద్రవ్యం నిల్వలు ఆదా అవ్వడం వల్ల, అంతర్జాతీయ మార్కెట్లో డాలర్ తో పోలిస్తే భారత రూపాయి విలువ మరింత బలపడుతుంది.
- జాతీయ సంపద సృష్టి: ఈ గని ద్వారా కేంద్ర ప్రభుత్వానికి పన్నుల రూపంలో భారీగా ఆదాయం సమకూరుతుంది. ఈ సంపద దేశ మౌలిక సదుపాయాల కల్పనకు ఉపయోగపడుతుంది.
రాష్ట్రానికి ప్రయోజనం – రాయలసీమకు అసలైన ‘స్వర్ణ’ యుగం:
- ఆర్థిక వెన్నెముక: రాయలసీమలో వెనుకబడిన ప్రాంతంగా పేరొందిన కర్నూలు జిల్లా, ఇప్పుడు రాష్ట్ర ఆర్థిక రంగానికి డైనమోలా మారబోతోంది. ఏటా 1000 కిలోల బంగారం ఉత్పత్తి అంటే, రాయల్టీలు, రాష్ట్ర జీఎస్టీల రూపంలో ఏపీ ఖజానాకు నిత్యం నిధుల వరద పారుతుంది.
- ఉపాధి కల్పన: ఈ గని తవ్వకాలు, శుద్ధి, మరియు రవాణా రంగాల వల్ల ప్రత్యక్షంగా, పరోక్షంగా వేలాది మంది స్థానిక యువతకు ఉపాధి అవకాశాలు లభిస్తాయి. వలసలకు కేరాఫ్ అడ్రస్ అయిన కర్నూలు.. ఉపాధికి అడ్డాగా మారుతుంది.
- పెట్టుబడులకు ఆకర్షణ: “సంపద సృష్టించడం – దాని ద్వారా రాష్ట్రాన్ని అభివృద్ధి చేయడం” అనే పారిశ్రామిక విధానానికి ఈ ప్రాజెక్టు బ్రాండ్ అంబాసిడర్ గా నిలుస్తుంది. ఏపీలో పెట్టుబడులకు ఉన్న అనుకూల వాతావరణాన్ని ఈ గని ప్రపంచానికి చాటిచెబుతుంది.
తెరపై చూసిన కేజీయఫ్ సామ్రాజ్యం కేవలం ఒక వ్యక్తి ఆధిపత్యం కోసం సృష్టించబడింది. కానీ జొన్నగిరిలో మొదలుకానున్న ఈ రియల్ గోల్డ్ మైన్ ఆపరేషన్.. లక్షలాది మంది ప్రజల ప్రగతికి, రాష్ట్ర పునర్నిర్మాణానికి, నవ భారత ఆర్థిక స్వావలంబనకు ఒక బలమైన పునాది. రేపు పడనున్నది కేవలం ఒక గనికి పునాది కాదు… ఏపీ స్వర్ణ యుగానికి పునాది! జనరేటర్ల హోరు, భారీ యంత్రాల చప్పుడు మధ్య ఏపీ మట్టిలోంచి మెరవనున్న ఆ పసిడి కాంతుల కోసం దేశమంతా ఆసక్తిగా ఎదురుచూస్తోంది.
I am Sirisha N, an independent journalist and proud right-winger. With a Post Graduation from the AP College of Journalism, I bring professional rigor to grassroots reporting. My focus is on cutting through the noise to deliver the unapologetic truth and hold the establishment accountable.
