ఈ దంపతులు చేసిన ప్రధాన నేరాలలో భారతీయ సిమ్ కార్డులను పాకిస్థాన్‌కు సరఫరా చేయడం ఒకటి. పోలీసుల విచారణ ప్రకారం, సాహిల్ మరియు సమీర 2024-2025 మధ్య కాలంలో ఎనిమిది భారతీయ సిమ్ కార్డులను కొనుగోలు చేసి, వాటిని దుబాయ్ మీదుగా పాకిస్థాన్‌కు పంపారు. ఇందుకుగాను వారికి పాకిస్థాన్ ఏజెంట్ల నుండి సుమారు రూ. 30,000 ముట్టాయి. పాకిస్థాన్‌లోని ఐఎస్ఐ ఆపరేటర్లు ఈ సిమ్ కార్డులను ఉపయోగించి వాట్సాప్ ఖాతాలను సృష్టించారు. తద్వారా భారతదేశంలోని వ్యక్తులతో మాట్లాడటానికి, అలాగే ఇక్కడి వాట్సాప్ గ్రూపులలో చేరి సున్నితమైన రహస్య సమాచారాన్ని సేకరించడంతో పాటు, స్లీపర్ సెల్స్‌తో సురక్షితంగా సంభాషించడానికి ఈ నెట్‌వర్క్ ఉపయోగపడిందని దర్యాప్తు సంస్థలు వెల్లడించాయి.

సాహిల్ కేవలం సిమ్ కార్డులు సరఫరా చేయడానికే పరిమితం కాకుండా, భారత సైనిక స్థావరాలపై నిఘా (రెక్కీ) ఉంచే బాధ్యతలను కూడా తీసుకున్నట్లు పోలీసులు ఆరోపిస్తున్నారు. దేశంలోని వివిధ కంటోన్మెంట్ ప్రాంతాలపై సమాచారం సేకరించడం, ముఖ్యంగా కోర్ట్ మార్షల్ విచారణ ఎదుర్కొంటున్న ఆర్మీ సిబ్బంది వివరాలను పాకిస్థాన్‌కు చేరవేయడం వంటి తీవ్రమైన కార్యకలాపాలకు అతను పాల్పడ్డాడు. అంతేకాకుండా, క్షేత్రస్థాయిలో గూఢచర్యం చేయడానికి మరియు ఈ నెట్‌వర్క్‌ను మరింత విస్తరించడానికి అవసరమైన వ్యక్తులను గుర్తించి, వారిని ఈ ఉచ్చులోకి లాగేందుకు కూడా ఈ దంపతులు లాజిస్టిక్ మద్దతును అందించినట్లు స్పెషల్ సెల్ పోలీసులు గుర్తించారు.

వీరి నేపథ్యం మరియు అరెస్టు వివరాలను పరిశీలిస్తే.. ఇగ్నో (IGNOU) ద్వారా బీఏ చదివిన సాహిల్ గతంలో ఒక లాయర్ వద్ద పనిచేసి జూన్ 2025లో ఉద్యోగం మానేసి నిరుద్యోగిగా ఉన్నాడు. ఇక సమీర నోయిడాలోని ఒక కాల్ సెంటర్‌లో పనిచేసేది. 2024లో ఇన్‌స్టాగ్రామ్ వేదికగా పాకిస్థాన్ ఏజెంట్లతో వీరికి మొదటి పరిచయం ఏర్పడింది. ఉగ్రవాద సంస్థలకు మరియు స్లీపర్ సెల్స్‌కు లాజిస్టిక్ సాయం అందుతోందన్న పక్కా సమాచారంతో ఢిల్లీలోని సరాయ్ కాలే ఖాన్ ప్రాంతంలో సాహిల్‌ను ముందుగా అరెస్టు చేశారు. అతని మొబైల్ ఫోన్‌ను ఫోరెన్సిక్ పరీక్షలకు పంపగా ఈ పూర్తి వ్యవహారం వెలుగులోకి వచ్చింది. అందులో లభించిన వాట్సాప్ చాట్స్ ఆధారంగా సమీరను కూడా అదుపులోకి తీసుకున్నారు. ప్రస్తుతం వారి ఆర్థిక లావాదేవీలు, వారి వెనుక ఉన్న ఇతర ఏజెంట్ల గురించిన కీలక వివరాలను రాబట్టడానికి పోలీసులు లోతైన దర్యాప్తును కొనసాగిస్తున్నారు.

The post ఢిల్లీలో పట్టుబడిన ఐఎస్ఐ (ISI) గూఢచారులు.. 30 వేల కోసం దేశద్రోహం చేసిన దంపతులు. appeared first on .